सम्बन्ध सुदृढीकरण जुइगु व्रत माय्अप्सं

सम्बन्ध सुदृढीकरण जुइगु व्रत माय्अप्सं

सरोज शाक्य
स्रोत : विजयलाल डंगोल 

 च्वबहाःद्यः काठमाडौं उपत्यकाया मरुगणेद्यःयाथासं ७ किमि तापाक्क च्वंगु छगू थाय् कच्छपाल सुवर्णगिरी महाविहारय् विराजमान जुयाच्वनाबिज्याःगु दु । थ्व थासय् न्हापा म्हासुख्वाः द्यः करुणामय बिराजमान जुयाच्वंगु खःसा आः वयाः ह्याउँख्वाः या करुणामय श्री आनन्दादि लोकेश्वर बिराजमान जुयाच्वंगु दु । म्हासुख्वाःद्यःयात च्याङ्ग्रासि द्यः धाय्गु याः । थ्व च्याङ्ग्रासि धाःगु टिबेटन भासं करुणामय द्यः खः ।

उपत्यकाया प्यम्ह करुणामय मध्ये छम्ह श्रीआनन्दादि लोकेश्वर लोकंह्वाःगु थाय्नापं द्यः जुयाच्वंगु दु । थ्व द्यःया विशेषता धइगु रोग लंका बीगु खः । विशेष यानाः छ्यंगूया ल्वय् थुम्हं द्यवं लंकाबी धइगु जनविश्वास दु । कतिंपुन्हीनिसें सकिमिला पुन्हीतक च्वबहाःद्यःया मेला न्याइ । मेला गुबलेनिसें न्ह्याःगु धकाः थौंतक छुं प्रमाण मदुसां बाखंत न्यनेबलय् न्हापान्हापा द्यः देगः त्वःताः पिहाँ विज्याइगु जुयाच्वन । छन्हु अथेहे पांजु द्यनाच्वंगु इलय् गद्दीइ द्यः मखना: पांजु ग्याकाच्वन । वयांलिपा सुथसिया पहराय् स्वःबलय् हाकनं वहे गद्दीइ विराजमान जुयाच्वंगु जुल । अथे जुयाः थ्व इलय् द्यः पिहाँ बिज्याइ धकाः दक्व भक्तजनत द्यः नाप लाय्गु निंतिं द्यःयाथाय् वइगु जुयाच्वन । द्यः पिहाँ बिज्याइगु खः मखु, गय् याना: सीकल धाःसा द्यःया पुलिं क्वय् म्हासुगु रंग किनाच्वंगु जुयाच्वन । व हे जुयाः थौंकन्हय् बालिइ तूस्वांया रंग किउगु खनाः पिहाँ बिज्याइगु धइगु सिइकल ।

थ्वहे क्रमय् मेलाया दथुइ माय्अप्स नं च्वनेगु यानावयाच्वंगु दु । माय्अप्सं धाय्बलय् लच्छियंकं च्वनेमाःगु अप्सं जूसां नं थौंकन्हय् न्यान्हुतक अप्सं च्वनेगु चलन दु । थ्व न्यान्हु अप्सं च्वनेबलय् च्वबहाःया थःगु तीर्थत म्हसीकेगु निंतिं न्यान्हु न्याथाय् म्वः ल्हुकेगु यानावयाच्वंगु दु । न्हापां चखुंबखुं तीर्थ (क्वय्ना), निन्हुखुनु जय तीर्थ (बागमती व प्रभावति तीर्थया दोभान नख्खु खुसि स्वन्हुखुनु ज्ञान तीर्थ (जन्को), प्यन्हुखुनु सुलक्षण तीर्थ (च्वबहा:या क्वय्ध्वाखा) खःसां नं थौंकन्हय् वयाः क्वय्गाः (च्वबहाःतया दथुइ च्वंगु बुंगालय्) म्वःल्हुकेगु यानावयाच्वंगु दु | अनंलिपा पुण्यतीर्थ (च्वबहा:या दथुइच्वंगु लँय् दुगु बुंगाः) य् म्वः ल्हुकेगु यानावयाच्वंगु दु ।

थथे माय्अप्सं च्वनीबलय् एकादशिनिसें सकिमिलापुन्हीतक च्वनीगु खःसा पारु खुनु माय्अप्सं थना यंकीगु यानावयाच्वंगु दु । थथे अप्स च्वनेबलय् मनोकामना पूरा जुइगु नापं रोगकष्ट आदि लंकीगु विश्वास दु । थनया चलनकथं आःतक नं माय्अप्स च्वंम्ह मिसायात छेँपाखें थं मवल धाःसा बिहा: जुइ धुंकूम्ह जूसां सुनां थन वयानापं बिहाः जुइगु दु धाःसा बिहा: मजूनिम्ह खःसा सु मिजनं थन व हे नाप बिहाः जुइगु चलन दु ।

माय्अप्स च्वनीबलय् न्यान्हुतक अप्स च्वनीपिसं म्वः ल्हुयाः नीसी यानाः च्वनी । थ्व इलय् द्यःयाथासं बीगु नीलः बाहेक मेगु लखं तुतितकं सिले मज्यूगु नियम दु | म्वः ल्हुया वय् धुंकाः द्यःयाथाय् वयाः अर्धपुजा याय् धुंकाः नीलः पालं जुइ सा थुबलय् नीलः त्वंम्ह मनुखं नील: मत्वंनिम्ह अप्स च्वंम्हेसित तक नं थी मज्यू । अप्यं च्वंपिनिपाखें सन्ध्याइलय् मत बीगु याइ । अप्स च्वंपिनि परिवारं तक नं नियम पालना याय्मा: । अप्स च्वनीम्ह न्यान्हुतक द्यःयाथाय् हे च्वनेमाःगु नियम दु । अन च्वनेगु निंतिं देगःपाखें सुया व्यवस्था यानातइसा माय्अप्सं स्वःवइपिनिपाखें अप्स च्वनीपिनि निंतिं नीगु लासा, फांगा हयाबीगु चलन दु ।

माय्अप्सं च्वनेगु झ्वलय् सकिमिलापुन्हीया छन्हु न्ह्यः बहनी लासा थनेगु चलन दु । लासा थनेगु धइगु च्वनाच्वंगु थासं थाय् हिलेगु खः । थाय् हिले बलय् च्वनाच्वंगु थासं थःगु लासाफांगा थना: मेगु थासय् च्वनेगु याइ ।

पुन्ही खुनु भक्तजनपिसं माय्अप्सं च्वंपिंके स्वां प्रसाद काय्गु चलन दु ।

माय्अप्सं धुंकेबलय् पारु खुनु सुथय् क्षितिकर बोधिसत्व (गन्धेश्वर वैतराग) द्यःयाथाय् म्वः ल्हुयाः पुजाय् च्वनी । पुजा याइबलय् नेवाःतय् विहारया गुरुजु तयाः पुजा जुइ । खय्, खयनीतय् थः हे ब्रम्हूत तयाः व्यंके पुजा याय्गु चलन दु । व्यंकेगु धकाः मन्दः दय्काः धलं दनेगु चलन दु । थुकिया मू ज्या धइगु तः सि लःल्हाय्गु खः । तःसि सु अप्सं च्वंगु खः वया परिवारया लिक्क च्वंम्हेसित लःल्हाइ । तःसि लःल्हाना का:म्हेसिनं हे अप्सं च्वंम्हेसित थनी । पुजाय् लुँकःमि ज्वलं, कुमाः ज्वलं, तम्वः ज्वलं नापनापं फलफूल आदि छाय्गु याइ । नापं द्यःयाथाय् बिहारया नियम कथं कर काय्गु चलन दु ।

माय्अप्सं च्वनीबलय् मिजंत नं च्वं वइ । मिजंत च्वनीबलय् नं मिसात च्वनीगु थें हे नियम खःसा मिजंत च्वनीबलय् छेँ परिवारया लिक्क लाःम्हेसिनं थं वइगु चलन दु । माय्अप्सं थने धुंकाः नं प्यन्हु लिपा प्यन्हु बिचाः वय्गु चलन दु । प्यन्हु विचाः वइबलय् द्यःया पुजा सामानया नापं आगं पुजा याय्गु चलन दु ।

माय्अप्सं च्वंम्ह मनुखं दच्छियंकं हे नियम पालना याय्माः । दच्छिलिपा पुन्ही खुनु दरु च्वनाः माय्अप्सं क्वचाय्की ।

माय्अप्संयात सामान्यरूपं पारपाचुकेगु व्रत धकाः धाय्गु याः । तर थ्व पारपाचुकेगु धलं जक मखु । सम्बन्ध सुदृढिकरण याइगु व्रत नं खः । थौंस्वयां स्वदँ न्ह्यः माय्अप्सं च्वंम्हेसिया इहिपा: जूगु थुकिया दसि खःसा छेँया पारिवारिक समस्या समाधान जुयाः सम्बन्ध सुदृढ जूगु दसु नं यक्व हे दु ।

माय्अप्सं क्वचाय्कीगु इलय् च्वबहाःद्यःयाथाय् पुजा क्वचाय् धुंकाः अप्स च्वंपिनि छेँय् थःथःगु गच्छेकथं भ्वय् न्याय्केगु नं चलन दु । 

न्यनकने :
जुजुभाइ शाक्य, ल्यूथाय्पा