पिने लाःम्ह मिसाचा

उपन्यासया खँय्

        पिने लाः वंम्ह मिसाचा खुदँ न्हय् न्ह्यव हे च्वयेगु मतिइ लुयाच्वंगु छगू उपन्यास खः । नेवाः देय् दबूया भाषा प्रशिक्षणया झ्वलय् गब्लें गन गब्लें गन लानाच्वन । थ्वहे भवलय् २०७३ सालया जेठं लछितक बिर्तामोडय् भाषा कक्षा न्ह्याकाच्वनागु इलय् थुगु उपन्यासया बारे छत्वाचा खँ च्वया । वयां लिपा नं नेवाः देय् दबूया अधिवेशन, स्थानीय निर्वाचन व संघीय नाप नापं प्रदेशसभाया चुनावं ध्यान अन ला थन ला हे मदयाच्वन । निदँ लिपा असार श्रावणया चर्को निभालय् हाकनं छक्वः सुनसरी जिल्लायागु इटहरी उपमहानगरपालिकाय् भाषा व लिपि स्यनेगु ज्याय् वने माल । थ्वहे अवसरयात सदुपयोग यानाः तान्वया पिने वयेत थाकुया क्वथाय्सं च्वनेमाःगु इलय् च्वच्वं वना ।

        नेपालभाषां च्वयागु थ्व जिगु न्हापांगु उपन्यास खः । न्हापा पिहां वःगु नुगः दुनेया मि’ ‘मनको आगो’ धकाः इलामं पिहां वःगु खस् नेपाली भाषाया उपन्यासया नेपालभाषा रुपान्तरण जक खः । ‘दिदी भाईको माया’ धाःसा जिं इलामया गजुरमुखीइ च्वनाः च्वयाः ख्वपं पिथनागु खः । धनकुटा जिल्लाया परेवादिन गाविसय् भाषा व लिपि स्यनेत लछि च्वनाबलय् नेपालभाषां अनुवाद यानागु ‘नुगः दुनेया मि’ ओखलढुंगाय् च्वनागु इलय् अनं पिथनागु खः । २०४८ सालं च्वयागु ‘मेरो जीवन साथी’, २०५१ सालं च्वयागु ‘हिउँदको घाम’, २०७२ सालं च्वयागु ‘गृष्मको पानी’ उपन्यास थें थ्व उपन्यासयात नं ब्वमिपिसं ययेकीगु आशा याये ।