क्वाति

भिंतूना

नेपालभाषा केन्द्रीय विभागया ब्वँमि मय्जु केशरीमैयाँ प्रधान श्रेष्ठं ने.सं. ११३८ दँय् नेपालभाषा स्नातकोत्तर तगिं निगूगु दँय् नेवाः समाजय् क्वाति विषयक शोकपत्र न्ह्यब्वयादीगु खः । नेवाः समाजया त्वःफिके मज्युगु पक्षया ल्याखं खनेदुगु क्वातिया म्हसीका, क्वाती तइगु यानातःगु दु । विशेष यानाः बूबलय् दइगु थीथी तत्वया व्याख्या, थीथी कथंया बूवः गुंपुन्हिबलय् जक क्वाति त्वनाः वयाच्वंगुली थुगु सफुतिं क्वाति उगु पर्वय् जक सीमित मखु धकाः उलाब्यूगु दु । नेवाःतय्सं १७ ताजि क्वाति त्वनाः वयाच्व.गु व क्वातिं शरीर विज्ञानय् गुज्वःगु सकारात्मक प्रभाव लाकी धकाः न्ह्यथनातःगु दु । क्वाती दइगु थीथी गुणयात कथंहंक च्वयातःगु शो धपत्रय् नेवाःतय् दथुइ ल्यनाच्वंगु सांस्कृतिक मूल्यमान्यता नं उलेगु कुतः याःगु दु । थुकथं थीथी पक्ष कःघानाः च्वयातःगु थुगु शोधपत्र सफूया रूपय् पिदनेत्यंगु लसताया खँ खः । थ्व नेपालभाषा केन्द्रीय विभागया गौरवया नं विषय खः । नेवाः जनजीवनय् क्वातुक्क स्वापू दुगु क्वातिया महत्वयात ल्यंकेत व वैज्ञानिक पक्ष उलेत थ्व सफू ग्वहालि जुइगु ताय्का । थुगु सफू पिथनेधुंकाः भविष्यय् नं थुकथंया अनुसन्धानात्मक च्वज्या न्ह्याकादी धैगु भलसा कासें च्वमि मय्जुया जीवन सुथां लाय्माः । भिन्तुना ।

डा. राजनलाल जोशी
सहप्रा. तथा प्रमुख
नेपालभाषा केन्द्रीय विभाग