हर्षरत्न धाख्वाः
(नेपालय् दकले न्हापां नेवाः भासं (नेपाल भाषां) आख: व्वंकिइगु स्कूलया नां ख. धर्मोदय पाठशाला । थ्व पाठशालाया बारे स्यूपिं मध्यय् छम्ह शिक्षण सेवा समर्पित पूर्व प्रधानाध्यापक व हनेबहम्ह वयोवृद्ध विद्वान खः भाजु हर्षरत्न धाख्वाः । उके धर्मोदय पाठशाला बारे छपु लेख च्वया बियादीत वय्कःयात इनाप यानागु जुल । अस्वस्थताया कारण: लेख तयार याये मफुसां लुमंगु खँ नेपाली भाषां टिपोट याना बियाहया द्यूगु भाय् हिला: न्ह्योब्वयागु जुल । थुगु ज्याय् ग्वाहालि याना दीम्ह यल देय्या वयोवृद्ध वामपन्थी नेता श्री चन्द्रशेषर रघुवंश श्रेष्ठजु खः । – सम्पादक)
यल नागबहालय् वि.सं. १९८५ साल रिखे स्थापना जूगु ‘धर्मोदय पाठशाला’ नेपाल देशय् दकले न्हापां नेपालभाषाया माध्यमं आखः स्यनिगु जनस्तरं निस्वंगु स्कूल खः । थ्व स्कूल निस्वना दीपिं सुब्बा विहारीलाल श्रेष्ठ, पुष्पराज हाक्य, नागबाहाःया ‘धाख्वा’ साहुत, नागबाहाःया हे खिचा गुभाजु वज्राचार्यत खः । थ्व विद्यालयया उद्देश्य नेपालभाषाया माध्यमं शिक्षाया विकास यायेगु खः । थ्व विद्यालयया न्हापांम्ह प्रधानअध्यापक ख: । यल बुबाहाल निवासी पं. रत्नबहादुर वज्राचार्य ।
थ्व विद्यालय संचालन यायेत सुब्बा विहारीलाल श्रेष्ठ, धाख्वाः साहुत व मे:मे:पिं साहुतय्सं नं आर्थिक ग्वाहालि याना दीगु खः । भवन जक नागबाहाःया खिचा गुभाजु वज्राचार्यपिसं चन्दा ब्यूगु खः ।
वि.सं. २००४ सालय् पद्य शमशेर श्री ३ महाराजा जुया च्वंबले थ्व ‘धर्मोदय पाठशाला’ व ‘शारदा विद्यालय’ निगुलिं छगू यानाः थ्वया नां ‘त्रिपद्य विद्यालय’ नाम नां हिइका: सरकारी स्वीकृति बिया सरकारी अनुदान नं बिल । थौं थ्व विद्यालयया नां ‘त्रिपद्य विद्याश्रम माध्यमिक विद्यालय’ खः ।
‘धर्मोदय पाठशाला’ चायेका पठन पाठन शुरु याःगु इलय् शहीद सुक्रराज शास्त्री, वय्कःया केहें चन्द्र कान्ता देवी व गो.प. या सम्पादक प्रेमराज शर्माजुपिंसं स्कूलया VISIT याना दीगु खः ।
पद्यशमशेर श्री ३ महाराजा जुया च्वंतले गभर्नमेन्टपाखें गभर्नमेन्ट ग्रांट धका दछिया छक: अनुदान नं बियेगु याःगु खः । मोहनशमशेर श्री ३ महाराज जुसेंली पद्म शमशेरया पालंनिसें बिया च्वंगु आर्थिक अनुदान बन्द याना बिल । उबले मास्तरतय्गु तलब ६/- खुतका खः ।
नेपाल संस्कृति – भाग १
