थुगुसी सुजन बागः श्रेष्ठं म्येप्वाः खंकीगु

थिमि (रासस)- थुगुसी बोडय् जुइगु म्येप्वाः खनेगु जात्राय् सुजन बागः श्रेष्ठं म्येप्वाः खनीगु जूगु दु । बोडेया २७ दँया श्रेष्ठं न्हापांखुसी थथे म्येप्वाः खंकेत्यंगु खः । वय्कः गुक्वःतक म्येप्वाः खंकेधुंकूम्ह बुद्धकृष्ण बाग श्रेष्ठया चिधिकःम्ह काय खः । बुद्धकृष्णं २०६१ साल निसें २०६४ साल तक प्यक्वः व थ्वयां लिपा २०७३ सालं निसें निरन्तर म्ये प्वाः खंका वयाच्वंगु दु । २०६५ निसें २०७२ तक यानाः च्याक्वःतक जुजुभाइ बाग श्रेष्ठं म्ये प्वाः खंकूगु खः । बोडे जुइगु म्येप्वाः खनेगु जात्राया आःतक दुगु तथ्यांक व प्रमाण कथं वंगु सछि व खुदँया दुने झिंनिम्हेसिनं म्ये प्वाः खंकूगु दु । थुकी मध्ये दकलय् अप्वः वि.सं. १९९१ निसें २०२३ तक हरिदेव किला श्रेष्ठं स्वीनिक्वः तक म्येप्वाः खंकूगु खः । अथेह वि.सं. १९६९ निसें १९९० तक हर्कनरसिंह बासँ श्रेष्ठं नीनिक्वः, वि.सं. २०२४ निसें २०२६ तक हरि भासिंक श्रेष्ठं स्वक्वः, २०२७ व २०२८ यानाः इन्द्रबाटा श्रेष्ठं निक्वः, २०२९ निसें २०३१ तक यानाः हर्केश्वर ब्यां श्रेष्ठं स्वक्वः, २०३२ निसें २०३८ तक यानाः चन्द्रसेन द्यों श्रेष्ठं न्हय्क्वः, २०३९ निसें २०४६ तक यानाः दिलकुमार खपे श्रेष्ठं न्हय्क्वः, २०४७ य् मुनि घों श्रेष्ठं, २०४८ य् धर्मराज बलाय श्रेष्ठं, २०४९ निसें २०६० तक कृष्णचन्द्र बाग श्रेष्ठं झिंनिक्वः म्येप्वाः खंकूगु इतिहास दु ।

स्नाेत - नेपालभाषा टाइम्स११४३ चौलाथ्व चतुर्दशी