रेवतीरमणानन्द श्रेष्ठ
इन्द्रया:या ज्य:गु शब्द यन्द्या वा येंद्य: ख: | थ्व नख: यंलाथ्व द्वादशीनिसें यंलागा: त्रितिया (गातिला) तक ७/८ न्हु हनीगु ख: | यसिँ (इन्द्रध्वज सिँ ) थना: थाय्थासय् इन्द्र ब्वया: इन्द्रया पूजा वा इन्द्रया ऐरावत किसि (पुलुकिसि) या जात्रा (यात्रा) जुइगु महिना जुया: इन्द्रला,एन्दला, यंला धयाह:गु ख: | यँदे:(यन्बु) या लाय्कुली यसिँ थनीबलय् न्हापा जुजु नं बिज्याइगु २००७ साल लिपानिसें बिमज्यात |
यसिँ थनिखुनु द्वादशीया बहनी, सीपिनिगु नामय् उपाखा हूवने धका: येँदे:या पुलांगु लागाया सिथंसिथं धुं धुँपाय् च्याका: अथेहे थाय् थासय् पाल्चा च्याका: देश चा:हुलेगु या: | यन्द्द्या: बेलय् गणेश , भैरब वो कुमरिया नं जात्रा जूइ |
भैरबयात म्हुतुं थोँ हाय्के छिन्क दयेकात:गु छ्यं जकया भैर:द्य: (हाथोंद्य:) नं थाय् थासय् ब्वयात: | यँदे:या जुजु जयप्रकाश मल्लं यन्द्या:बेलय् कुमारीया रथ सालेगु नं चलन या:गुलिं यँय् मे:थाय् स्वया: अपो झह्झह धा: | कुमारी सा: खुनु हे पृथ्वीनारायण शाहं जयप्रकाश मल्लयात बुका: कुमारीयात सम्मान या:गुलिं नं कुमारी जात्रा त:धना च्वंगु दु ।
यन्द्या:बलय् मनूत यन्कीदह (इन्द्रकिल दह) स मो:ल्हुयेत वनीगु ख:| यलपाखे इन्द्रयात यन्मा:द्य:(इन्द्रमहराज द्य: ) नं धा:| यन्द्या: बिशेषयाना: समय् नया: न्ह्यइपुक च्वनेगु नख ख:| उकिं थ्वबेलय् पुन्हीखुनु छेंया च्वय् पिनेपाखे खायात:गु दलुखय् सीम्हया नामय् इन्द्रयात मत बिया: समय्बजि इनेगु वो नयेगु नं या:| अथेहे मचात “ला छकू वयेक समय् बजि” धका: छेँय छेँय् फ्वंवनेगु या:|
वंशावली कथं ने.सं. १०७ पाखें यलं यँय् लायकू ल्ह्य:म्ह लिच्छबि जुजु गुणकामदेवं नं इन्द्रजात्रा न्यायेकुगु खँ दु | थुम्ह जुजुं थ:गु लायकू यलं यँय ल्ह्यया: यँदे:यात कान्तिपुर नां त:गु ख:| अथेहे थुम्ह जुजुं महालक्ष्मीया भक्त जुया: नवदुर्गा,महाकाली, रक्तिकाली आदि देविपिं स्थापना यासें इन्द्रयात्रा, कृष्णयात्रा, लाखेयात्रा, नेकू पुइगु यात्रा, ध्याच: छ्वाकेगु जात्रा आदि न्यायकेगु नं यात | कान्तिपुर नां जुयेन्ह्य: थन इन्द्रपुर नां जुयाच्वंगु न्यनेदु |
नेवा: संस्कृतिया बिद्वान भाजु सत्यमोहन जोशीया खँ कथं (“नेपाली चाड् पर्ब”-इन्द्रयात्रा ) यसिँ (इन्द्रध्वज) यात हनुमान ध्वाखा (यँदे:या लायकू) या चुकय् तलेजुदे:गया न्हेवने, कामेश्वर दे:ग:या थुखे, इन्द्रपुरी दे:ग:या फ:या नापं भाद्र शुक्ल द्वादशी खुनु सुथय् शुभ मुहूर्त्तय् राजकीय सम्मान कथं बिधि पूर्बक थनेगु चलन दु | थ्व खं कथं नं यँदे:या न्हापाया नां इन्द्रपुर ख:| इन्द्रया नामं दयकात:गु पुर जुया: थन न्हापानिसें यसिँ थनेगु जात्रा न्यायेकेगु संस्कृति दु ख:धयागु सिये दु | तर इन्द्रपुर धयागु नां कान्तिपुर नां जुयेन्ह्य: गुबेलय् सुनां त:गु वा छुं जुया धयाह:गु ख: सिये मदुनि |
न्ह्यागुसां गुणकामदेव स्वया: न्हापा थ्व थाय्या नां इन्द्रपुरी वा इन्द्रपुर खत | थ्व हे इन्द्रपुर शब्द ज्यला: एन्दबु ,यम्बु, अले यँ जुगु जुयेमा: गथे काष्ठमण्डपया काठमाडौँ, कीर्तिपुरया किपू जुल | अथवा इन्द्रद्य: दुगु थाय्या नामं नं थ्व थाय्यात इन्द्र धा:गु जुयेफु गथे दक्षिणकाली द्य: दुगु थाय्यात दक्षिणकाली, भद्रकाली दुगु थाय्यात भद्रकाली, बालकुमारी द्य:दुगु थाययात बालकुमारी,स्वयम्भू दुगु थाय्यात स्वयम्भू इत्यादि |
अले थुगु थाय् वाचक इन्द्रया यन्द अनंलि यँ जक जुया: ज्यला वंगु नं जुयफु । अथेहे इन्द्रयात्रा शब्द ज्यला: इन्द्रया: अनंलि यन्द्या: आ: थौंकन्हे यँया: नं धयाहल | तर यँद्या: (इन्द्रया:) नख: यँदे: नाप जक स्वा:गु मखु यल आदि मे:मे:थाय् नं स्व:गु नख: ख: | थुकिया कारण थ्व नख: येँ ,यल, ख्वप (कान्तिपुर,ललितपुर,वो भक्तपुर) आदि कथं थी थी राज्यया उत्पति मजुनिगु इलय् न्हापा हे दये धुंकुगुलिं जुये मा: |
