रविन्द्र महर्जन
तिकिझ्या:वा:पौ
यें देशय् येँया: पुन्हि न्याय् की थें तु यलय् प्याङ गामय् धा:सा इमिगु मौलिक जात्रा हना वयाच्वंगु दु । येंया: पुन्हिया झ्वलय् कालेश्वर महाद्य:या जात्रा हे इमिगु त:धंगु जात्रा ख: । कालेश्वर महाद्य:या जात्रा येंया: पुन्हिया दिनं निसेंहे शुरु जुइ । कालेश्वर महाद्य:यात प्याङ्गगांयापिं मनुतय्सं आराध्यदेव धका: माने यानावयाच्वंगु दु । अथेजूगुलिं इमिसं कालेश्वर महाद्य:यात थ:पिनिगु दुगुद्य: कुलदेवता हे माने याना: पुजा यानावयाच्वंगु दु ।
थुबले बांलाकात:गु ख:यात प्याङ्गगांया छेंखाछेंखा पतिकं चाहिकी । जात्राया इलय् हे पुजा याइम्ह मनुखं गं थाना: च्वाम्बलं गाय्केगु ज्या तकं जुइ । परम्परागत बाजं नापनापं चिलाखया ल्यूल्यू द्य: ख: जात्रा न्ह्याइ । द्य: तइगु छें खुलाय् छक: छक: याना: कालेश्वर महाद्य:या भुतिं तइगु जुइ ।
जात्राया झ्वलय् हे गांयापिं मनुतय्सं थाय् थासय् कालेश्वर महाद्य: पुजा याय्गु नं याइ । थ्व इलय् हे गांया थी थी थासय् च्वंपिं सिंया पुलांपिं द्य:पिं हया: दबुलिइ व्वय्गु चलन नं प्याङ्ग गामय् दु । जात्रा जुया च्वंगु ई ज्व:छि थथे सिंया द्य:पिन्त ब्वया तइ । येंया: पुन्हिया इलय् येंया इन्द्रद्य: भैल:द्य:पिन्त ब्वयात: थें तुं प्याङ्ग गामय् थथे द्य: पिन्त ब्वय् हइ ।
हनुमानध्वाखा कालमैरव न्ह्य:ने लाय्कुलिं य:सिं थना येंया: शुरू याइ सा थन गामय् नं निगू थासय् य:सिं थना: जात्रा न्याय्की । वहे दिनं थ:थितिपिन्त नखत्या स:ता: नकी । थ्व हे इलंनिसे हे लाखे प्याखं न ल्हुइकी थथे जात्रा शुरू जूगु स्वन्हु खुन्हु थन परम्परागत द्य: प्याखं नं ल्हुकी । थौंकन्हय् बजेट मगा:गु कारणं याना हे थथे थीथी द्य:पिनिगु प्याखं चले मजुया वंगु खनेद ।
न्हापा न्हापा येंया: लायकुलिइ तकं वया: जुजुपिन्त थ्व प्याखं क्यनेगु जुया च्वंगु दु । थथे प्याङ्ग गांया थ:गु हे म्हसीकां जा:गु प्याखंया अस्तित्व हे मदुगुलिं छगू ला दु:खया हे खँ ख:। पुन्हिया दिंनं कालेश्वर महाद्य:या झ:झ: धाय्क हे ख: जात्रा जुइ । थ्व दिनय् अन गाँयापिं मनुतय्सं खतय् च्वंम्ह महाद्य:या पुजा आजा याय्त ज्या मयासे सां मानय् याइ । मोहनी स्वन्ति स्वया: त:धंक थ्व जात्रा हनीगु जूगुलिं न भव्य रूपं हनेगु यांनावयाच्वंगु ख: । प्याङ्ग गांयापि त:मिचीमि दक्व जाना: सुख जुइमा धका: कामना नं याय्गु याइ ।
थथे कामना याइबलय् छम्ह मनू व छगू परिवारया जक इच्छा पूरा जुइमा मधासे प्याङ्गगांयापिं फुकं मनूतय्लिसें देय् / राष्ट्रयागु हित जुइमा धका कामना याय्गु चलन नं दु । अन्नबाली बांलाय्मा, यक्व उब्जनी जुइमा, सुयातं ल्वचं मकाय्मा छु नं दु:ख मलाय्मा , अकालं मथिइमा धका: तकं प्रार्थना याइ । थथे प्याङ्ग गामय् च्वपिं मनूतय्गु म्हसिका कथं नं छगू समुह मिलय् जुया मौलिक थासय् मौलिक जात कथं थ:गु संस्कृति संस्कार व समाजय् च्वना थ्व जात्रा याय्गु याइ ।
थ्व जात्रा खुनु द्य:ख:यात त्वा: त्वालय् छेंखा छेंखा पतिकं चाहिका: महाद्य:या भक्ततय्त दर्शन याकी । मेमेबलय् धा:सा मनूत देगलय् देगलय् वना: पुजाया:वनीसा जात्राया इलय् द्य: स्वयम् छेंय् छेंय् वना: दर्शन व्यू वनी ।थथे द्य: छेंय् छेंय् पतिकं चाहिलीगुया अर्थ ख:मनुतय्गु सुखदुख न्यनेकनेया लागि थथे चाह्यू वंगु धैगु खंय् इमित विश्वास दु । प्याङ्ग गांयापिं मनुतय्गु बुईं स:गु अन्न, सि नं महाद्य:यात छाय् हइगु चलन दु । अथे छाय् हइबलय् ई कथंया सि व बूब:, तुसि, फसि, आलु बखरा, आमासि, पासि, सन्त्रासि, मेवा, केरा, लौका थेंज्या:गु वस्तुत नं छाय् हइ । च्वख मनं छाय् ह:गु चीज दक्व द्य:या प्रसाद जुइ । मेमेगु जात्राय् द्य:पिन्त पशुबली बिइगु चलन दु धा:सा थ्व जात्रा मशुबली बिइमखु । पशुबली बिया मनुतय्गु इच्छा पुवनी मखु धइगु विश्वासकथं थुगु जात्राय् बलि बिइगु चलन हे मदु । थुकथं जात्रा ज्व:छि थ्वँ , अयला: ला, न्या तकं नय् मज्यगु चलन दु । छगू कथंया अपसं च्वना: हे थ्व जात्रा मानय् याइगु ख: ।
द्य:दुकाइगु वा जात्रा क्वचाय्किगु इलय् बाल्मो गुथिया मनूतयसं परम्परागत छगू प्याखं क्यनी । थ्व प्याखं मेमेगु प्याखं स्वया: पा: नापं प्याखं चान्हय् क्यनीगु जुइ । थ्व हे इलय् य:सिं क्व:थली, जात्रा क्वचाइ । थ्व जात्रा गबले निसें शुरू जुगू धैगु छु नं इतिहास व अभिलेख धा:सा आ:तक लुइके फुगु मदुनि । तर स्थानीय श्रद्धा थुगु जात्रायात थौंतक निरन्तरता बियावयाच्वंगु दनि ।